UNIVERSIDADE DE CALIDADE.

• España está moi por debaixo da media europea en gasto público para o ensino superior e a investigación, xa que só adica o 1,1% do PIB á educación superior fronte ó 1,6% dos países da OCDE. O gasto por alumno universitario en España está no 47% da media dos países da OCDE (1997). O gasto público en I+D está situado no 65% da media europea (EUROSTAT 1998).

• Neste senso, e para mellora-la calidade da Universidade débese instar o incremento do financiamento para á educación pública superior mediante unha política xusta dos diferentes poderes públicos. Esixencia ós poderes públicos de dotar ó sistema universitario dos recursos económicos necesarios para equipara-lo gasto público universitario á media dos países da Unión Europea, a través de un plano de financiamento plurianual.

• Débese alcanza-la máxima calidade na xestión da Universidade de Vigo ó servicio da comunidade universitaria e da sociedade en xeral, mediante unha mellora no ratio do PAS/alumno/profesor.

• Hai que iniciar un proceso de descentralización e desconcentración, para achega-la administración universitaria ós usuarios e dotar dos recursos necesarios ós servicios, para que desenvolvan con plena garantía as súas competencias e poidan ofrecer á comunidade un servicio de calidade.

• Xeneralización e potenciación das estructuras universitarias dos Campus, respectando as administracións dos Centros, dentro dun proceso de descentralizacións dos servicios.

• Impulso dunha reforma administrativa que, entre outras accións ten que contemplar a racionalización do actual cadro de persoal, mediante a revisión das actuais RPT’s, adecuando o seu crecemento ás necesidades e ás novas tecnoloxías, e asociada á profesionalización da xestión dos empregados públicos, á mellora na carreira profesional e incidindo na separación das tarefas de dirección política e as de estricta xestión administrativa.

• Potenciación e definición das funcións correspondentes a cada centro de xestión, incidindo na labor de coordinación das tarefas, e elaborando documentos informativos que recollan as prestacións dos servicios, evitando a contratación externa para a realización de traballos que deben ser desempeñados por persoal propio.

• Elaboración de repertorios normativos, actualizados periodicamente, e de manuais de procedemento administrativo e de xestión que garantan a homoxeneización, axilidade e seguridade xurídica do traballo desenvolvido nos servicios.