Un grupo de compañeiros e compañeiras, funcionarios e laborais, unidos na visión e defensa dunha Universidade pública, democrática e de calidade, decidimos constituir unha candidatura para presentarnos ás eleccións ó Claustro que celebraranse o próximo día 7 de maio. Converxencia Unitaria do PAS, defínese como plural, aberta, independente e progresista, abranguendo as diferentes tendencias e ideoloxías que están presentes no noso colectivo para facelas converxer nunha serie de obxectivos esenciais e comúns: a defensa de democracia na Universidade, da ensinanza pública e da dignificación da labor do PAS.

Como todos sabedes, nesta nova etapa que comeza na vida universitaria o Claustro terá que elaborar uns Estatutos para adaptarse á nova lexislación. A aprobación e entrada en vigor da Lei Orgánica de Universidades supón unha agresión para a democracia e a autonomía universitaria xa que instaura un modelo elitista, xerárquico e antidemocrático no funcionamento institucional e dos órganos de goberno e de representación. Polo tanto, e na medida que nos sexa posible, necesitamos paliar os efectos negativos da citada Lei a través do que se dispoña nos novos Estatutos. A tarefa que nos espera é de suma importancia se non queremos perder unha boa parte dos dereitos que xa tiñamos acadados e tamén para procurar mellorar o xa conseguido.

Converxencia Unitaria do PAS é a única candidatura que integra e conta co apoio dos membros da CIG, CC.OO e UXT con presencia en ámbolos dous órganos de representación do PAS: Xunta de Persoal funcionario e Comité Intercentros.

Converxencia Unitaria do PAS componse de persoal funcionario e laboral dos distintos ámbitos (Servicios, Centros e Campus) que comparten idéntica estratexia: a defensa de todo o colectivo de traballadores, ó marxe da súa pertenza a un sector concreto, coa intención de achegar as experiencias e inquedanzas de todo o persoal e plasmalas nunha alternativa conxunta e unitaria.

Converxencia Unitaria do PAS é independente de calquera grupo de poder que aspire a gobernar a Universidade e se guía tan só pola salvagarda dos dereitos e intereses do PAS, así como polo funcionamento democrático e transparente da Universidade. Neste senso, nunca serviremos de soporte ou escudo para o desenvolvemento das políticas dos diferentes equipos de goberno.

Converxencia Unitaria do PAS oponse radicalmente á concepción da Universidade dun xeito mercantilista, competitivo ou empresarial, que ten como finalidade a búsqueda da rendibilidade económica e desvíase do seu compromiso como Institución pública de educación superior. Polo tanto, seremos críticos e combativos ante calquera intento dos grupos de poder ou presión, tanto universitarios como extrauniversitarios, de implementar procesos de privatización dos servicios ou que pretendan aplicar un modelo de Universidade alleo á función pública que ten que desempeñar: a docencia, a investigación e a xestión pública universitaria ó servicio dos cidadáns e da sociedade en xeral, segundo parámetros de calidade baseados nun financiamento público suficiente e axeitado.

Converxencia Unitaria do PAS, en fin, está aberta e necesita de tódalas contribucións que poidades realizar, sen apriorismos, exclusións nin condicións de ningún tipo.

En resumen, anunciamos a presentación ás eleccións ó Claustro da nosa candidatura. Esperamos contar co voso apoio e colaboración activa.