Somos conscientes de que a posición de debilidade obxectiva do PAS aumentou coa entrada en vigor da Lei Orgánica de Universidades. Nembargantes, aínda que a nosa forza semella pequena, pode resultar de vital importancia para que a voz de todo PAS se escoite e sexa tida en conta na redacción dos Estatutos, así como para procurar que a Universidade non apareza como coto privado de ninguén, senón pertencente a todos e para todos: pública, democrática e de calidade, centrada no apoio e desenvolvemento das estructuras culturais, sociais e económicas de Galicia.

Queremos salientar que a nosa candidatura móstrase disposta a colaborar, en igualdade de condicións, cos representantes das outras opcións do persoal que acaden representación no Claustro. Creemos que na redacción dos Estatutos o principio que debe inspirar a nosa actuación é a defensa de todo o PAS como colectivo, e que aí as nosas forzas acumuladas deben coincidir e terán que traballar en conxunto.

En calquera caso, a política da nosa candidatura vai a ser de total transparencia. Neste senso, terase especial cuidado na comunicación directa cos traballadores dos diferentes sectores, servicios e Campus, así como na necesaria coordinación coas diferentes seccións sindicais e cos órganos de representación dos traballadores, de xeito que se garanta a participación e a pluralidade de todo o persoal, tanto no proceso de elaboración dos Estatutos canto no que atinxe ás actuacións que se desenvolvan no Claustro e noutros órganos de goberno.